बैदेशिक रोजगारमा जान चाहने व्यक्तिले सिक्नैपर्ने आधारभूत ज्ञान प्रदान गर्ने उद्देश्यले यो तालिम संचालन गरिन्छ । तालिमबाट सामान्य जानकारी मात्र राख्दा पनि कामदार सुरक्षित हुन सक्छ ।

विदेश जाने व्यक्तिले यो तालिम लिनका लागि :-

• वैदेशिक रोजगार विभागबाट अनुमती प्राप्त अभिमुखिकरण संस्थाबाट लिनुपर्छ, अभिमुखिकरण तालिमको अवधि २ कार्यदिनको हुन्छ,
• वैदेशिक रोजगारका लागि छनोट भएका प्रत्येक कामदारले रोजगारीमा प्रस्थान गर्नुअघि लिनुपर्छ, अभिमुखिकरण तालिम लिएको प्रमाणपत्र पेश नगरी वैदेशिक रोजगारीमा जान पाइदैन,
• काठमाण्डौं उपत्यकामा र उपत्यका बाहिरका विभिन्न जिल्लाहरुमा अनुमती प्राप्त अभिमुखिकरण संस्थाहरु छन् । तीमध्ये जुनसुकै संस्थाबाट तालिम लिन सकिन्छ,
• ७ सय रुपैया तिरी उक्त तालिम लिन सकिन्छ,
• महिला कामदारले तालिम लिँदा तिरेको रु ७ सय वैदेशिक रोजगार बोर्डको सचिवालयबाट फिर्ता दिइन्छ,

अभिमुखिकरण तालिमबाट निम्न विषयहरुमा जानकारी हाँसिल गर्न सकिन्छ :-

• नेपालको वैदेशिक रोजगार कानून सम्बन्धी,
• रोजगारीमा जाने मुलुकको भौगोलिक स्थिति, संस्कृति, रहनसहन, आर्थिक, सामाजिक र राजनैतिक अवस्था सम्बन्धी,
• रोजगारीमा जाने मुलुकको भाषा सम्बन्धी,
• रोजगारमा जाने मुलुकको श्रम, अध्यागमन कानून तथा ट्राफिक नियम सम्बन्धी,
• एच.आई.भी./एड्स, सरुवा रोग, यौन तथा प्रजनन स्वास्थ्य सम्बन्धी,
• व्यवसायजन्य सुरक्षा तथा स्वास्थ्य सम्बन्धी,
• सहज र सुरक्षित यात्रा सम्बन्धी,
• कामदारको आचरण, व्यवहार र सुरक्षा सम्बन्धी,
• विदेशमा कमाएको आय सरल, सहज र सुरक्षित रुपमा नेपाल पठाउने सम्बन्धी, आदि ।

तालिम आफ्‌नै सुरक्षाका लागि भएकाले विदेश जाने व्यक्तिले अनिवार्यरुपमा यो तालिम लिनुपर्दछ ।