वैदेशिक रोजगारमा जाने कुनैपनि नेपाली कामदारले अनिवार्य रुपमा म्यादी जीवन बीमा गरेर मात्र श्रम स्वीकृति लिन पाउने नियम छ । वैदेशिक रोजगारीका लागि जाने कामदारले उसको उमेर र काम गर्नै अवधिका आधारमा यो प्रकारको बीमा गर्ने गर्छ ।

वैदेशिक रोजगर म्यादी बीमा गर्दा लाग्ने बीमाशुल्क सो व्यक्तिको उमेर र काम गर्ने अवधि अर्थात बीमा अवधिका आधारमा फरक-फरक हुन्छ । उमेर समूह अनुसार तीन फरक-फरक शुल्कमा बीमा गरे बापत तिर्नुपर्छ । जसमा १८ वर्षदेखि ३५ बर्षसम्मको एक समूह, ३६ देखि ५० बर्षसम्मको अर्को समूह र ५१ देखि ६४ बर्ष सम्मको अर्को समूह निर्धारण गरिएको छ । शुल्क छुट्टै लागे पनि दावी भुक्तानी भने समाननै हुन्छ । यसरी गर्न मिल्ने बीमा अनलाइनबाटै सहजै गर्न सकिन्छ ।

यस प्रकारको बीमा गर्दा राहदानीको स्क्यान कपी, नागरिकताको स्क्यान कपी, एक प्रति पासपोर्ट साईजको फोटो स्क्यान गरेर अपलोड गरेर गर्न सकिन्छ । ईसेवा र खल्तीमार्फत अनलाईनबाट बीमा गर्न सकिने सुविधा छ । कम्पनीको वेबसाईटबाट नै बीमा भएको नभएको हेर्न पनि सकिन्छ । यस्तै बीमा अवधि पनि हेर्न सकिन्छ । साथै वैदेशिक रोजगारको श्रम स्वीकृति पाएपछि वैदेशिक रोजगार बिभागको वेबसाइटमै आफ्नो पासपोर्ट नम्वर हानेर आफ्नो बिमा पोलिसी नम्वर र बीमा गरेको बीमा कम्पनिको समेत जानकारी लिन सकिन्छ । यस प्रकारको बीमाका बीमाङ्क रकम १० लाख रुपैयाँको हुन्छ ।